Бейне дӏахьош йолча туркхетачен доакъашхой даькъалабувцаш, къамаьл дир вай Мехкадас
«Гобаккхарал доккхагӏа» яха кагирхой туристически кхетаче я, вай мехка дӏайолаеш. Жӏайрахьа кхален Бейне хилар цу оагӏонцара моттиг. Укх бетта 20-ча денгара 23-ча денга кхаччалца йолча хана, СКФО тайп-тайпарча миӏингашкара къонабараш гуллургба цига. Вӏаший доттагӏал тоссаш, тайп-тайпарча къамий ӏадаташ, истори довзаш, иштта гобаккхарца дувзаденнараш доаржадеш, ха дӏахьоргья къонабараша беркатеча лоаме. Из гӏулакх дӏадоладарца къамаьл дир царга вай мехкадас Келаматанаькъан Махьмуд-Ӏаьлас.
«Къилбаседа Кавказа тайп-тайпарча моттигашкара кхаьчача хьаьшашка моаршал хоатт тахан! Лоаман моттигаш тохкаш, истори, культура йовзаш, вӏаший доттагӏал тоссаш, массехк ди дӏахьоргда къонабараша. Лоамаш, гӏалаш, истори довзаш ха дӏаяхьарал совгӏа, Гӏалгӏай мехкарча беркатах, тамашийна хозача ӏаламах дог диза, мохк безабенна болаш цӏенах кхета беза хьаьший. Кхы а юхабахка догьоттаргдолаш моттиг хийла Бейнех. Шоашта ма хетта ха дӏаяхьа, дега салоӏам бе, кхерамзленца дувзаденнараш лорадеш лоаман моттигаш тахка, аьттув хилба доакъашхой!» - аьлар вай Мехкадас.
Программан юкъе я лекцеш, спорт, кхоллам, иштта кхыдараш а. Къонабарашта хьехаргда наькъаш тувлацадара гӏулакх, лозаваьчун хьалхара гӏо дар, иштта лагере кхача кийчбар мишта хила деза. Цул совгӏа, сурташ доахаш, цӏихезача тохкамхошца къамаьл деш, лоамашкара хозаленаш йовзаш, ха дӏахьоргья цар цига.
