Къахьегама шоатта деношка дакъа лацара тӏахьех Мехкадас республикера бахархой
Бекарга бетта 4-ча денгара 25-ча денга кхаччалца, мехка дӏахьоргдола къахьегама шоатта денош хьаллацар дех вай мехкадас Келаматанаькъан Махьмуд-ӏаьлас бахархошка.
«Сердалога» из хоам бера мехкадаь зарбан болх лелаберашкара. «2026-гӏа шу вай республике экологе Шу да аьнна белгалдаьлга кердадаккха лов сона. Вай мехкарча ӏалама хьал тоадара тӏехьа дӏахьош ба из лоархӏаме болх.
Хӏара къахьегама шоатта вай шахьарашка, юрташка лостам бе, гаьнаш дӏайогӏа, урамий, ковний куц тоаде аьттув луш дола беркате гӏулакх да», - аьлар вай Мехкадас. Цу юкъе хургда ерригача республике доаржадеш дола диъ къахьегама шоатта.
Иштта берригаш арабаьнна дӏахьош бола болх шийна тӏехьа дика лар юташ хул, цул совгӏа къахьега араяьннача тоабашта юкъера бувзам, барт а чӏоагӏлу. ӏалама моттигаш лораяр вайх хӏаране лоархӏаме декхар да!
