Республикера кагирхой театр тоадеча балхага хьежар вай Мехкада
Культуран гӏулакхех йолча министерствонна хьалха латтача Лаьнанаькъан Залинайца, Наьсарерча паччахьалкхен кагирхой театра гӏишло меттайоалаеш дӏахьоча балхага хьожаш хилар вай мехкада Келаматанаькъан Махьмуд-ӏаьла. 202 миллион сом да из болх дӏабахьа хьахьожадаьр. «Дезал» яхача къаман проекте чуйодаш йолча Россе Президента Путин Владимира чӏоагӏонца юкъеяьккхача Федеральни проектага гӏолла деш хувцамаш да уж.
«Театра гӏишло тоае езача хьале этта дукха ха яр. Россе Президента новкъосталца, кердача куца тӏа йоалаеш я театра гӏишло. Болх боаггӏача боараме дӏахьош ба ала йиш я тахан, 60%-га кхоачаш кийча я гӏишло. Театре къахьегаш болча наха атто еш хувцамаш хургда цу чу. Таханарча ханага хьежжа тоаеш латт гӏишло. Цу чу хургда къаман кхоллама Цӏа а»,- яздир вай мехкадас Келаматанаькъан Махьмуд-ӏаьлас ший телеграм-оагӏон тӏа.
Республикан кулгалхочо белгалдир, кагирхой театр меттадоаладар мехкарча культуран оагӏонцарча моттигашка доккхий хувцамаш дара юкъедодаш долга. Карарча хана Наьсарера культуран Цӏа тоадеш латт, Магасе хьалъеш латт Паччахьалкхен филармоне гӏишло. Ураотташ латтача къонача тӏехьенна геттара лоархӏаме моттигаш я уж.
Кхоллама оагӏонца начӏал долча вай къонабарий шоай республике деша, цхьацца говзал караерзае, шоай начӏал доаржаде аьттув хургболаш дӏахьош боккха болх ба тахан. Россерча кхоллама институташца, иштта Санкт-Петербургерча вузашца бувзаме болаш, лакха говзал йола актёраш, режиссёраш, исбахьален оагӏонцара болхлой кийчбергболаш къахьегаш ба тахан.
