Росгварде ветеранаши болхлойи даькъалабийцар вай мехкадас
РФ къаман гварде Федеральни гӏулакха эскар хьакхелла 10 шу дизарца даькъалабийцар Мехкадас цу оагӏонца къахьегараш. «Сердалога» из хоам бера Мехкадаь зарбан болх лелаберашкара.
«Цу юкъа шоай декхараш бехктокхаме кхоачашдеш, мехкара кхерамзлен хьал лорадара тӏехьа къахьегаш, хьабоагӏа уж нах. Экстремизм, терроризм яхача доккхача зулама духьала къовсам лоаттабеш, мехкара моттигаш лораеш, болх дӏахьош ба росгварде болхлой. Къаьстта доккха баркал кхайкаде лов тахан СВО дакъа лоацарашта. Халача хана Даьхен хӏама лорадеш, майралца, деналца шоаш дӏабовзийташ хьадоагӏа шо», - белгалдир вай Мехкадас.
Иштта доккха баркал аьлар республикан Кулгалхочо къонабараш ӏомабеш, царна нийса никъ хьехаш лаьттача ветеранашта. Могаш, маьрша долаш; иразе, аьттонца, беркатаца дахалда шо!
