Культуран болхлой цӏайца даькъалабийцар Мехкадас
Культуран моттигашка къахьегараш шоай цӏайца даькъалабийцар вай мехкадас Келаматанаькъан Махьмуд-ӏаьлас. Из хоам «Сердалога» бир мехкадаь зарбан болх лелабераша.
«Ноахалашта юкъера бувзам лорабеш, чӏоагӏбеш бола оагӏув ба культура. Вай мехкарча культуран оагӏонца дувзаденнараш тоадара тӏехьа къахьегаш ба тахан. Укх тӏехьарча шерашка цу оагӏонцара моттигаш тоаеш, керда гӏишлош хьалъеш, начӏал долча наьха оагӏув хьаллоацаш, цхьацца проекташ йоаржаеш болх ба дӏахьош. Вай кхоллама оагӏонцарча тоабаша боаггӏача боараме дӏайовзийт республика арахьарча моттигашта.
Лоархӏаме дакъа цу оагӏонца дӏалоацаш ба шоаш карадерзадаьр къонабарашта ӏомадеш бола ветеранаш», - йоах Мехкадас ший къамаьла юкъе. Республикан кулгалхочо теркалдир, кастта кердача паччахьалкхен филармоне ший наӏараш хьаелларгйолга.
Культуран оагӏонцарча моттигашка тахан къонабараш ӏомабеш, цар начӏал гучадоаккхаш, дӏахьор боккха болх болга белгалдир Мехкадас. Могаш-маьрша болаш, иразе, аьттонца, беркатаца баха даькъалабийцар цо культуран даькъ тӏа къахьегараш!
