Архипо-Осиповке байнача наьха дезалашка кодам бийцар Мехкадас
Краснодарерча Архипо-Осиповка яхача курортни моттиге ВСУ саг чувоацаш гӏетташ болча гӏирсо доккха хатар дир. Геттара дукха нах шоай дезалашца салоӏаш багӏача хин юхерча доазон тӏа ӏобежар из. Цу доккхача хатара юкъе ялх сага вахар хаьдад, царна юкъе кхо бер долаш. Байнарий дезалий дог тедеш, цар гӏайгӏа екъаш, оагӏув хьаллоацаш къамаьл дир вай мехкадас Келаматанаькъан Махьмуд-Ӏаьлас.
«Краснодарски моттига губернатор волча Кондратьев Вениамин Ивановичага сайгара, берригача гӏалгӏай мехкагара цар оагӏув хьаллоацаш, тахан царга кхаьчар боккха бала болга кхетадеш, дог тедеш, къамаьл ду аз. Геттара хала хет цу къемата юкъе бераш нийсденна. Нах байна халача хьале эттарашкара гӏайгӏа екъаш да тхо тахан. Лозабаьраш ма хулла сихагӏа меттабоагӏалба! Эшаш дола гӏо де, оагӏув хьаллаца кийча ба тахан Гӏалгӏай мехка», - аьлар Келаматанаькъан Махьмуд-Ӏаьлас.
Цу унзарча гӏулакха юкъе нийсвеннараш верригаш 40 саг ва. Геленджика, Туапсински кхален дарбанчешка ӏочувигараш 17 саг ва, царна юкъера виъ саг (ши бер юкъе долаш) геттара халача хьале ва.
Лозабаьрашка хьожаш ба Краснодарера, иштта юхерча санаторера лораш. Эшаш долча цӏийна кхоачам болаш ба шоашка аьнна хоам бир Минздраво. Туристашца, лозабаьрий гаргарча нахаца болх дӏахьош психологаш ба. Россе Тохкама Комитето уголовни гӏулакх хьадийллад цу къизача балха духьала.
