Нижнекамске хиннача хатара юкъе бейнарех кодам бийцар вай Мехкадас
Саг чувоацаш гӏетташ лелача гӏирсаша Нижнекамске оттадаьча хатаро вӏашкабихьа ба Татарстане. Маьршача наха юкъера 13 сага вахар хаьдар из бахьан долаш, цу юкъе цхьа бер да. Тайп-тайпара човнаш хулаш лозаваьраш 39 саг ва. Шахьарерча дарбанче ӏочубига ба уж берригаш. Вай мехкаца вошал долча Татарстана оагӏув хьаллоацаш къамаьл дир мехкадас Келаматанаькъан Махьмуд-Ӏаьлас.
«Гӏалгӏай мехкарча бахархошкара, шийгара Татарстана кулгал деча Минниханов Нургале Рустамага, оагӏув хьаллоацаш, царга кхаьча гӏайгӏа, бала бекъаш, байнарех кодам бувцаш йистхул со. Наьха дегашка лар юташ дола доккха халахетар да из. Къаьстта хала да дега цу юкъе бер хилар. Байнарий гаргарча наьха цу унзарча хатара сатоха, ца боха денал хилда, лозабаьраш, ма хулла сихагӏа меттабаьхка, цӏенах кхеталба», - белгалдир Келаматанаькъан Махьмуд-Ӏаьлас.
Промышленни моттигашта санна, Нижнекамска нах бахача кхаленашка а доккха зе даьд саг чувоацаш гӏетташ долча гӏирсаша. Лозабаьрашка хьажа Казанера, Набережные Челны яхача шахьарера лорий тоабаш хьакхаьчай Нижнекамске, иштта Россе унахцӏенон гӏулакхех йолча министерствон хьалха латта Мурашко Михаил ва, цу гӏулакха тӏахьожам беш.
Россе Тохкама Комитета террористически актах йолча сатьях гӏулакх хьадийллад маьршача наха духьала унзара зулам хьадарах.
