Миннаца кулгалхочо кхетаче дӏайихьар, Гуржий мехкарча къоаной Кхела викалашца
Гуржий къоаной Кхела викалаш ба вай мехка баьхка. Вай мехкарча щоайяр санна йолча Кхелаца кхетаче хилар Гуржегӏарча хьаьший. Ерригача Кавказе турпалал гойтарца цӏихеза волча Дербичанаькъан Хизара да, нана болча баха хилар уж. Иштта эздий воӏ кхеваьрашта баркал, аьнна, цар дог тедеш къамаьл дир гаьнара баьхкача, царех дог лазаш болча хьаьшаша.
Мехкарча Миннаца хьалха латтача Мизенаькъан Руслана кхетаче дӏайихьар царца тахан. «Магасерча Коталон Парке баха, Даьхен гӏулакхе лаьттарашта оттадаьча сийленга юхе деналца, майралца белгабаьннача къонгий вахара наькъах дийцар цар.
Гуржегӏара кхаьчача викалаша хьоахадир, Гуржий мехка Дербичанаькъан Хизара сийлен «Кавказа денал» яха орден къоастаяьлга. Къамашта юкъера барт, бувзам чӏоагӏбеш, Кавказе машар лорабара наькъ тӏа къахьийгараш белгалбергба цу орденца», - дийцар «Сердалога» Мизенаькъан Руслана.
Гуржегӏара баьхкача хьаьшашца экскурси дӏайихьар Барта Гӏалан чу. Гӏалгӏай къаьнарча гӏалай хьисапе хьаяь йола из музей массане бӏарг тӏаотташ, мехка мел кхаьча хьаьший тӏалатташ моттиг я. Магас, Кавказера гувнаш шоаш ма дарра хьагойташ йолча Гӏалан лакхе; къаман ӏадатех, культурах, оамалех; гуржий, гӏалгӏай шин къаман юкъе тхьоврача хана денз хиннача бувзамех, доттагӏалах дувцаш; лаьттар берригаш. Гуржий мехкара баьхка хьаьший чӏоагӏа раьза болаш, дог айденна бар иштта лакха лоархӏаш шоаш тӏаэцарах, юкъера барт чӏоагӏбеш дола гӏулакхаш гойтарах.
Белгалде деза гуржий, гӏалгӏай нах дукхача хана денз шоайла тӏаотташ, вӏаший гӏулакхаш леладеш, лоалахошта юкъе хила деза дикаш доаржаде ловш хьабаьхкалга.
