Галашка интернат хьалъярга хьажа ваха хилар гӏишлошъяра министр
120 моттиг йола ишкол-интернат хьалъеш боахк Галашка. Гӏишлошъяра министр Иленаькъан Муса ваха хилар цу балхага хьажа. Дӏадахача шерарча наджгоанцхой бетта дӏаболабаьб из болх цу оагӏонцарча министерствос тӏадилла. Республикерча Чаненаькъан А. цӏерах йолча санаторни - хьун ишкола лаьрхӏа, «Цаӏ йолча Россе» юрташкара моттигаш меттайоалаярах йолча программага гӏолла дӏахьош ба из болх.
«Карарча хана чура пенаш шаьрдеш, кораш дӏаоттадеш, тӏера тхов нийсбеш боахк цига. ООО «Орбита» яхача гӏишлон балхаш леладеча фирма болхлой ба иштта хий чудуллаш, ток дӏачухьош, йӏовхалца, канализацеца дувзаденнарашка гӏолла къахьегаш боахкараш, ков тоадеш йоалл цхьа тоаба. 45 саг, пхи машин я беррига болх дӏахьораш. Болх малагӏча боараме дӏахьош ба тохкаш хиннача Иленаькъан Мусас хьалхадаьккхар деррига а цхьаккха кхоачамбоацар доацаш меттадоаладаь хила дезилга. Цул совгӏа, юххьанца къоастаяьча хана чакхбаьккха хила безаш ба беррига болх. Ерригача республиканна мо, Галашка бахача наха а лоархӏаме моттиг я из», - йоах «Сердалога» гӏишлон балхех йолча министерствера кхаьчача хоамо.
Ерригача республикерча берашта лаьрхӏа хьалъеш я из ишкол. Ворхӏ эзар совгӏа адам дахача Галашкарча наха болх бе моттигаш ӏалашъергья цу проекто.
Укх шера хьаелла езаш я ишкол. Белгалдечох, йиллача хана чакхбаьккха хургба болх.
