Гӏалгӏайчен Паччахьалкхен кулгалхо нах тӏаэцаш хилар
Гӏалгӏайчен Паччахьалкхен Председатель Сластенин Владимир аргӏанара нах тӏаэцаш дола ди дӏахьош хилар. Цо ладийгӏар наьсархой, иштта Наьсарен, Магӏалбика кхалений бахархой хаттарашка. Хаттараш дувзаденна дар вахара хьалашца. Цу юкъе бар цахаддаш маьха чухьнахьа йолча молхашца ӏалашо лоаттае езаш бола унахой. Уж латкъар молхаш хьакхоачаш яц, аьнна, иштта кхыбарий лоткъамаш дувзаденна дар нах бахача даькъ тӏара тока хьалаш во хилара. Хӏара хаттар теркама юкъеийцар премьер-министра, цу хаттарех бола болх лелабеча боахамашта, лоаццача хана уж кхоачашдара декхар хьалхашка оттадир.
«Наьсарен кхален вахархо инсулин оала маха ца техача мегаш вац. Из вера ший хаттар дахьаш цу дийнахьа. Республикан Министерствон тӏадиллар цу сага эшаш дола новкъостал дар, молхашца ӏалашо яр. Из хаттар къоастадергда унахцӏенон Министерствос, цо доагӏаш дола новкъостал дергда цунна. Магӏалбика кхален яхархочо дийцар Заьзганаькъан-Юрта ше яхача цӏагӏа электричество цахиларах. Ток лаьгӏа хилар бахьан долаш, тӏехьара тӏа тока бӏоагӏа оттабе безаш ба. Магӏалбика кхален администрацена тӏадиллар тӏехьара тӏа тока бӏоагӏа оттабар, хӏаьта «Ингушэнергона» хьалхашка декхар оттадир, юртара токацара хьал тоаде, ток ший боарамах хилийта», - аьлар «Сердало» газетага республикан Паччахьалкхене.
Уж хаттараш хоадам боллаш къоастадара Сластенина юкъебаьхар министерствай, боахамий говзанчаш, доал деча даькъ тӏара администрацеш, иштта таронашца ӏалашо лоаттаяра организаце кулгалхой. Из бахьан долаш цу моттиге хӏара хаттар дикагӏа къоастаде таро хилар.
