Гӏалгӏайчен сага бокъонаш лораечо хьаллаьцар боккхача дезала наьна оагӏув
Гӏалгӏайчен сага бокъонаш лораяра викалга дехар дир, Эккажкъонгий-Юрта яхаш йолча боккхача дезала нанас. Цо белгалдир ший дезала бокъонаш телхаеш моттиг нийсъенна хилар. Цхьан бера доагӏаш дола пособи соцадаь моттиг нийсъелар цун, цун дезалерча пайданга хьежача из дикка ӏаткъаш хилар цар вахара хьалашта.
«Гӏалгӏайчен сага бокъонех волча викала Россе Вахара ганзе цу хаттарга хьажар дехаш каьхат дӏадахьийтар. СФРа тохкама болх дӏабихьачул тӏехьагӏа, гучадаьлар технически гӏалат даь хилар. Цу тайпара цу бера доагӏаш дола ахча хьадоладир, цул совгӏа соцадаь лаьттача хана доагӏаш хиннар а юкъе долаш», - аьлар «Сердало» газетага Гӏалгӏай Республикан УПЧ хоамий - аналитически даькъ тӏа.
Эккажкъонгий-Юртарча боккхача дезала пособи хьадоладаларах чӏоагӏа новкъостал хул. Цудухьа цу кхалсага, ше сага бокъонех волча викала хьаллацарах, гӏадъяхар дийца вала йиш яц.
