Дукха бераш дола дезалаш, шергара шерга бебаш латт
Дукха бераш дола дезалаш, хӀара шера тӀакхеташ латт вай мехка. ДӀадахача шера 1 335 яхача таьрахьа тӀа лаьттабале, укх шера уж 1 763-га кхоачаш ба. Из хоам «Сердалога» бир Мехкадаь зарбан болх лелабераша. МоллагӀа тайпа халонаш нийсъяларах, вай къаман юкъе массахана хьаллоацаш хиннад, дезал боккха хилар. 2023-гӀа шу хьаийцача, боккхий дезалаш болча мехкашта юкъе 3-ча моттиге я вай республика.
«Дезал дукхагӀа хилар, гаргало лелаяр массахана дика лоархӀаш хиннад вай къаман юкъе. Республикан кулгалхоша тахан боккха болх дӀакхухь, боккхача дезалашта новкъостал лоаттаде гӀерташ. Берашта ахча теларал совгӀа; къаман, паччахьалкхен программашка гӀолла керда ишколаш, берий бешамаш хьалъеш латт мехка», - белгалдир вай мехкадас Келаматанаькъан Махьмуд-Ӏаьлас.
Теркалде деза, «Мехка сагӀа» яхар санна бола боккха болам, таханара «Ишколе даха кийчде бер» яхар, иштта кхыдола боламаш чакхдоахача хана, дукха бераш дола дезалаш цу юкъехьолга. Цул совгӀа, моллагӀа Даьла духьа сагӀа, загат луш вола саг, дезал боккхагӀа болча из дала хьож.
