ЗӀамигача шахьарашта юкъе дӀайихьача ерригача Россе яхьашка котъяьлар Наьсаре
Истореца ювзаеннача моттигашта, йоккха йоацача шахьарашта юкъе дӀайихьача ерригача Россе ӀX яхьашка котало яьккхар вай Наьсарен-Шахьаро. Яхьаш дӀайихьар Калуге. Из хоам «Сердалога» бир шахьара администрацера.
Цу коталон тӀагӀолла, шахьарерча Ӏама гонахьара моттигаш тоае аьнна 103 126 100 сом рузкъа федеральни ганзера хьахьожадергда вайна. ГӀишлошъяра балхех йолча Министерствон къахьегама даькъа хьалха латтача ГетагӀазанаькъан Омараца котбаьннараш хьакхайкабеча дакъа лоацаш хиннача шахьара даьга, Йовлой Урусханага дӀаделар коталон совгӀат.
«Сона, са тоабанна чӀоагӀа лоархӀаме да из гӀулакх. Шахьара кулгалде се хьатӀавенача дийнахьа денз сатувсар аз, цу яхьашка котало яккхарга. ХӀана аьлча, шахьара моттигаш тоае иззал рузкъа ганзе дац, хӀаьта цига котало яккхаро боккха аьттув лора. Сколково яхача моттиге шахьара тоаба Ӏомалуш хиларо пайда бир.
Шоаша Ӏомадаьр юкъе лоацаш шахьара даь гӀонча йолча Мархенаькъан Маринас, керттера архитектор волча ЦӀечой Басира КБ тоабаца цхьана кийчъяь «Партисипация» яха проект эггара хьалхаяьккхар. Партисипаци лакха говзал, начӀал хиларца, тӀатоха хӀама доацаш тӀехдика вӀашагӀъеллар проект», - дийцар шахьара кулгал деча Йовлой Урусхана. ГӀишлон балхех йолча Министерствос, 2018-ча шера денз, хьаяхьаш я уж яхьаш Россе.
Цу юкъе дакъа лоацараш я, 200 эзарга кхоачаш нах баха шахьараш; моттигерча, федеральни истореца ювзаенна моттигаш.
