Гӏалгӏай Паччахьалкхен байракха 32 шу дизад
1994-ча шера маьтсела бетта 13-ча дийнахьа, 32 шу хьалха, хьакхеллар Халкъа Гуллама Гӏалгӏай паччахьалкхен байракхах йола бокъо. Цу гӏулакха хьалхаэттар вар цӏихеза Ӏилманхо, профессор Дахкилганаькъан Ибрахӏим.
Гӏалгӏай къаман син низ, духлохам белгалду кӏоарга маӏан дола сурт диллар воккхача профессора. Байракха кӏайча оасаша белгалду къаман нигат цӏена хилар, машар, эздел; хӏаьта лакхе, кӏалха гӏолла долхача баьццарча оасаша ӏалама боккха низ, вахар, ислам белгалду. Байракха юкъе латт цӏе тамагӏа – маьлха хьарак, цун кхо зӏы: хиннар, дар, хургдар; кхыча дешашца аьлча, цӏаккха кхоачалуш доаца вахар.
Тӏехьагӏо, 1999-ча шера кӏимарса бетта 11-ча дийнахьа хьакхеллар «Гӏалгӏай къаман паччахьалкхен байракхах» йола Конституционни бокъо. Цу гӏулакхо РФ Паччахьалкхен геральдически йоазонца дӏачӏоагӏйир цун моттиг. Тахан Гӏалгӏайчен байракх цхьанкхетара керттера белгало йолаш, Даьхен хӏама яхьаца, сийленца лорадеш дӏадахьа дезилга хьалхадоаккхаш бола гӏирс ба!
