Гӏалгӏайчен Госюрбюро Магӏалбике нах тӏаэцаш хилар
Магӏалбик шахьара администраце нах тӏаэцаш ди хилар, царна юридически новкъостал дир мах боацаш. Кхетаче дӏахьош хилара керттера бахьан дар нах хьаллацар, царна фу эш хар, наьха бокъонаш лораяр. Нах тӏаэцача хилар Гӏалгӏайчен Паччахьалкхен юридически бюрон говзанчаш.
«Цига юристаша моттигерча бахархошта довзийтар тайп-тайпарча бокъоний хаттараш; российски, моттигерча законий борам. Наьха хаттараш дар вахаре эша гӏо дехаш, лаьттан, доалахьарча боахама хьал дувцаш, ЖКХ, иштта къахьегама бокъонаш лораярца дувзаденна. Хӏаранена хьалхадаьккхар, царна хьалхашка нийслуш дола декхараш мишта кхоачашде аттагӏа хургда, цу гӏулакха фу деза», - аьлар «Сердало» газетага Магӏалбик - Шахьара администраце.
Цу тайпара кхетаченаш дӏахьош хиларо пайда лу. Магӏалбика администарце, Госюрбюрос лаьрхӏад, Магӏалбика бахархой хьаллоацаш, дӏахо а из болх дӏабахьа.
