Ишколаш дешара шерга кийча хиларах, дийцар мехкарча паччахьалкхено
Премьер-министр волча Сластенин Владимира кулгал деш, дIайихьача лоархIамеча кхетаче дийцар, вай мехкара ишколаш дешара шу дIадоладе мел кийча я. Цу оагIонца дувзаденнарех дийцар дешареи Iилмани гIулакхех йолча министерствон кулгалхочун декхараш кхоачашдеш йолча Угурчанаькъан ПаьтIамата, гIишлон балхех йолча министерствонна хьалха латтача Иленаькъан Мусас.
«Тов бетта хьалхара ди хьаотта йисар кIира ха мара яц, цунга хьежжа деррига сухал беш а доацаш, кхоачамбоацараш юкъе доацаш кийча хила дезаш да. 244 дешара моттиго шоай наIараш хьаелларгья дешара шу долалуча дийнахьа – 154 ишколо, 84 берий бешо, юкъерча оагIонцарча дешара 6 моттиго. Ялх моттиге карарча хана тоаяра балхаш да дIахьош. Дешара шу долалуча дийнахьа, беррига болх чакхбаьккха хила безаш ба. ХIаьта кхыйолча дешара моттигашка чоалхане доаца балхаш деш, кулг тохаш къахьийгад. Бераш ишколе хьакхувларгдола болх тоабеш ба мехка. Мах бала ца безаш, дешархой хьакхувларгба 97 ишколе, 138 автобус я цар доалахьа. Царна юкъера 128 автобус болх беш лела 10 шу совгIа ха я, 48 автобус заIапхой дола бераш дIа-хьа кхувла къоастаяьй», - дийцар «Сердалога» мехкарча паччахьалкхено.
Къаьстта терко еш дийцар кхетаче, дешара моттигий кхерамзлен хьалаца дувзаденнарех. Деррига тохкаш болх дIабахьа безача 244 моттигех 232 моттигага хьежаб тахан, кхерамзлен балхах дола паспорташ 229 ишколанна дIаденнад.
Вай мехкадас Келаматанаькъан Махьмуд-Iаьлас, геттара чIоагIа терко еш, тIадиллад; дешара шу долалуча дийнахьа еррига моттигаш боаггIача боараме кийча йолаш, наIараш хьаеллаш хилийта, аьнна.
