Илдарха-Гӏалий тӏа хьайбаш лечкъаду нах хьалийцар
Илдарха-Гӏалан полице хьалийцар моттигерча бахархой доахан лечкъадеш бола нах, яхаш, дийцар «Сердало» газетага ГӏР бокъонаш лораеча боахаме. «Гӏалгӏай мехкарча тохкама моттигаша кхоъ гӏулакх хьадийллар доккхий хьайбаш лечкъадарах. Тохкамхоша яхачох, 34, 18, 17 шу даьнна вола кхо вахархо доахан, сиргӏаш лечкъаеш хиннав», - аьлар хоамо.
Царех цаӏ хьалаца таро хилар полице болхлой, моттигерча бахархоша из лораварах. Цар телефон техар Россе МВД Илдарха-Гӏалан ха деча даькъ тӏа; бахархоша 18 шу даьнна зӏамига саг лаьцав, аьнна. Бокъонаш лораераш, кхы тӏехьа ца тетташ, цу моттиге хьакхаьчар: из ваьллав бежан лочкъаде, цу бежана мах 100 000 сом ба.
Цу хана цунца кхы ши саг хиннав, цар къайлабала аьттув баьннаб. Лоткъам эцаш, къонача къуно дийцар, 2025 шера лайчилла бетта ше 200 000 сома мах бола сиргӏа лочкъаярах, кхы а массехк ди хьалха, шийцарча нахаца цхьана цо лочкъаяьй 80 000 сома маьха сиргӏилг.
«Массехк сахьат даьнначул тӏехьагӏа, Илдарха-Гӏалий тӏа гӏолла волча Россе ОМВД ПДН воккхагӏа волча инспектора цу 17 шу даьннача зӏамигача сага, иштта цун наьнага бехк тӏаэцаш хилар чӏоагӏдеш, кхайкача тӏабахка безаш дола каьхат дӏаделар. Цо иштта дийцар, кӏеззига хьалхагӏа, ший новкъосташца цо Илдарха-Гӏалан Кирова урама йистерча баь тӏа яжаш яьлла мора бесара сиргӏилг лочкъаярах. Из цу хана ший новкъосташца хиннав. Из хьайба къаьнара пилорама йолча дӏачулаьллар. Шоллагӏча дийнахьа из эца саг лехар 55 эзар сомах. Цу тайпара цунна пхи эзар сом кхаьчар. Из 2025 шера бекарга бетта денз, ПДН профилактически учёте латташ ва», - аьлар МВД хоамо.
Бокъонаш лораерашта коравир дукха ца говш кхоалагӏа вола 34 шу даьнна къу, цо ше, хьайбаш лечкъадеш, цу юкъе хилар тӏаийцар. Цул совгӏа, из хиннав лочкъадаь хьайба эцаш вола саг лохаш. Цун духьала уголовни гӏулакх хьадийллар Гӏалгӏай Республике гӏолла йолча МВД тохкама болхлоша. 17,18 шу даьннарашта духьала уголовни гӏулакх хьадийллар Гӏалгӏай Республике гӏолла йолча РФ СК моттигерча тохкамхоша. Уж мехкара арабаргбоацаш чӏоагӏо яьй, иштта хьалхадаьккхад тоабалара никъ тӏаэцар.
