Гӏалгӏайчен цӏихезача виӏий Малсаганаькъан Ахьмада цӏи елар ЛНР ишколá
Луганскерча Халкъа Республикан Паччахьалкхено, Кременской кхален Варварински юкъарча ишкола цӏихезача гӏалгӏай къаман виӏий, Россе Турпалхочун Малсаганаькъан Татархана Ахьмада цӏи елар. Из ва, Даьхе лораеш, Сийлахь-боккха тӏом латтача хана ший вахар ӏодилла майра бӏухо. Гӏалгӏайчен Халкъа Гуллама экс-спикера Тӏумхой Мухьмада белгалдир, из хьал Гӏалгӏайчен, ЛНР юкъера бувзам чӏоагӏбеш долга, из дика дегӏабоагӏаш ба шин кхален юкъера бартчӏоагӏам баьчул тӏехьагӏа.
Политика баркал аьлар Лугански Халкъа Республикан Кулгалхочунна Пасечника, республикан Халкъа Совета Председатела Мирошниченко Дениса, цо белгалдир цар Даьхен бӏухой сий деш, иштта исторически тӏехьале лораеш хилар.
Гӏалгӏайчен бахархошта лоархӏаме да, денал долча шоай мехкахочун цӏи Луганска лаьтта малхаяьнна хилар, цар хургйолча тӏехьен из дагалоаттам биццабалийтара къахьегаш хилар, яхаш, дийцар Тӏумхой Мухьмада. Цу тайпара гӏа боаккхаш хиларо республикашта юкъера бувзам чӏоагӏбу. Шоайла лерхӏам болаш, исторически оагӏонаш лораеш хул, Даьхен мутӏахьа болаш къонгаш кхебу.
Тахан шоай даьша, цар даьша леладаь денала гӏулакхаш цу лаьтта дӏахо дӏахьош ба вай бӏухой. Уж чӏоагӏонца латт цига, лаьрххӏа йола тӏема операци дӏахьош, моастагӏа харцон тӏехьа кот ца валийта цаӏ санна этта; денал, майрал гойташ.
Сийлахь-боккхача тӏема турпалхой дагалоаттам лорабар, тахан Даьхе бахьан латачар лерхӏам бар шоайла бувзам болаш да, аьлар Тӏумхой Мухьмада. Къаьстта цу дийнача гойтамо таро лу кхувш йоагӏача тӏехьенна хӏанз латташ дола тӏема хьал, дӏаяхача ханашка хинна тӏом шоайла бувзам болаш хилар. Уж ба вай кхоане лорае езараш, дерригача халкъа барт, цхьоагӏо хилийтара шоашкара дакъа юкъедахьа дезараш.
Юххера, ше къамаьл даь воалаш, Гӏалгӏайчен Парламента экс-спикера цӏаькха а баркал аьлар Лугански Халкъа Республикан бахархошта, исторически дагалоаттам цар лорабарах, турпалхой сий дарах. Из тешаш ва дӏахо а Гӏалгӏай Республикан, Луганска Халкъа Республикан юкъера бувзам чӏоагӏлургхиларах, цо таро лургья моттигашта юкъера хьал дикагӏа дегӏадоаладе, шоайла бувзам лелабе, лоархӏаме вахара проекташ цхьана кхоачашъе.
