Шолжа кхален моттигашка гӏолла хьожаш хилар Гӏалгӏайченгара сенатораш
Сенатораш бола Илезанаькъан Микаил, Хамченаькъан Белан Шолжа кхален моттигашка гӏолла хьажа арабаьлар. Царца из болх дӏахьош вар мехкарча Паччахьалкхен, Мехкадаь Администрацена кулгал ду Мархенаькъан Анзор, кхален администрацена хьалха латта Татенаькъан Ӏийса, иштта кхыбола хьакимаш. Муниципалитета ЖКХ, вахара оагӏонца дувзаденнараш малагӏча хьале да тахка араяьнна тоаба яр из.
«Алхастерча берий бешага хьежар уж. Бахархоша, дукхача хана денз, дехар деш да керда гӏишло хьалъе е йолаш яр меттайоалае, яхаш. Из гӏулакх меттадоаладеш, малагӏа болх дӏабахьа беза дийцар хьакимаша цу моттиге. Дӏахо, Гӏажарий-Юрта хьалъеш латтача №1 йолча ишколага хьежар сенатораш. Ишкола юхерча доазон тӏа спорта лаьрхӏа моттиг хьаеллар дийцар. Иштта юртарча ФОКа тӏабодача наькъ тӏа лампаш йохкарах, наькъ тӏа басарашца къоастам барах дийцар, иштта Алхастен, Гӏажарий-Юрта юкъерча наькъ тӏа а лампаш йохкаш болх дӏабахьа безилга белгалдир сенатораша», - йоах «Сердалога» тахан мехкарча Паччахьалкхера бенача хоамо.
Хӏара моттигера кхоачамбоацараш юстардоахаш болх дӏабахьа лерхӏ мехка. Цкъарчоа тохкама болх дӏабихьа, тӏаккха ше-ший аргӏагӏа меттадоаладергда хӏара моттига хьал.
