ИнгГУ духхьашха юкъеяхар Россе дешара, ӏилман Министерствон ахчан хьалхале лелаерий сийлен таьрахьа
Гӏалгӏай паччахьалкхен университет, финансови хьал дика леладеш хиларах, Ерригроссийски финансово - экономически дешара, ӏилмай балха кулгалхой кхетаче, хьалхале лелаерий тоабанна юкъе я.
«Цу кхетаче гуллу цу лостамах долча боахамий кулгалхой, хьалхале лелаеш бола экономисташ, ӏилман-дешара даькъ тӏара ахчан дай. Кхетачено ше НИИ, вузий ахчан ӏалашон хаттараш дувцара дика майда хилар хьагойта дукха ха я, цунца Российски Федераце къаман хьалхашка латта декхараш кхоачашдарах. Карарча шера дӏахьош хиннача кхетаченна керте лаьтта хаттар дар; ӏилман, лакхарча дешара даькъ тӏа лоархӏаме декхараш кхоачашдара, бехктокхаме, пайда луш йола таронаш лелаяра ӏалашо яр.
Кхетачен маӏан дар, ӏаьдала болхлой, университетий, цу даькъ тӏара хьал дегӏадоаладара кхелахой юкъарлон низ вӏашагӏтохар», - аьлар «Сердало» газетага ИнгГУ.
Кхетачен хьалхара ди чакхдаьлар лаьрххӏа совгӏаташ луш; института, вузий керттерча диъ даькъ тӏа болх дӏахьош даьха толамаш белгалдеш. ИнгГУна хьалхара луш дар цу тайпара совгӏат, цо яьккхар «Финансай менеджмента дикала хьалхале лелаераш» яхача даькъ тӏа хьалхара моттиг.
Гӏалгӏай паччахьалкхен университета ректора Ӏалбаканаькъан Фатимас баркал аьлар Россе дешара, ӏилман Министерствон кулгалхошта, шийна иштта тешам баларах, вуза тоаба болх дика тӏаэцарах. Университета менеджмента лоархӏамеча, цунца цхьана чоалханеча даькъ тӏа хьалхале лелаеш хиларо тхо тӏахьех, вуза кхыча даькъ тӏа а из толам лакха лоаттабара», - аьлар цо.
