Ӏаьлий-Юрт-СурхотӀе яха никъ тоабеш латт республике
Ӏаьлий-Юрт, СурхотӀе хотташ бола никъ тоабеш боахк болхлой. Карарча хана хьалхара асфальта никъ ӀотӀабилла баьннаб уж. Йисача 4 км доазон тӀа никъ Ӏобилла кийчлуш ба. Наькъаца Ӏоюллаш латт хий дахьаргдола турба. Из хоам «Сердалога» бир наькъий гӀулакхех йолча Министерствос.
Республикера наькъаш тоадеш йолча программага гӀолла дӀахьош ба из болх. Из гӀулакх мишта дӀадода тахка ваха хилар укх деношка Министерствон кулгал деш вола Хаматхананаькъан Батыр. Балха хьалха латтачо белгалдир, деррига а боаггӀача боараме дӀадодаш хилар.
«Из никъ тоабе, яхаш, бахархоша дехар ду дикка ха яр. Чуийнна къахьегаш боахк цига тахан. ХӀара денна тӀахьожам лоаттабу аз цу балха. Проекта юкъе да гӀашлой наькъаш Ӏодахкар, наькъашкара гӀармаш оттаяр, бордюраш йоахкаш, басарашца къоастам бар. Кердача, паргӀата болча наькъ тӀагӀолла дӀа-хьа аха аьттув хургба вай бахархой кастта», - дийцар Хаматхананаькъан Батыра. 70 км кхоачаш долча наькъий хьал эргадаккха лерхӀ республике укх шера.
