Юрташкара спортивни хьал дегӏадоаладеш да
Гӏалгӏайчен Магӏалбика кхален Лохерча Ачалкхе (Даби-Юрта) хьалъеш латт йоккха спортивни комплекс. Хӏанз говзанчаш къахьегаш ба футбола аре тоаеш, баскетболах, воркаутах ловзара йола моттиг къоастаеш, тренажераш увттаеш, наха хьабаь бай ӏобуллаш. Цу проекта чуйоагӏаш аргӏанара физкультурно-унахцӏенон комплекс хьалъергья юрта. Цу гӏишлонга хьажа вахар сенатор Илезов Михаил.
«Цига дийцар болх вӏашагӏболлара хаттараш. Спортивни майда хьалъяра ийцад эшараш, гӏирсаш. Из проект кхоачашъе таро хилар Россе спорта Министерствоца цхьана болх дӏахьош хиларах. Юрта вах пхи эзар саг. Дукха ха яр укхаза цу тайпара хьалаш эшаш дола. Керда корпус хьалйича, ерригача Магӏалбика кхален спортивни вахара центр хургья», - аьлар «Сердало» газетага Илезов Михаила.
Сенатора белгала ма дарра, юрташка физкультуран дешар дӏадахьара дола хьалаш хьакхоллар, Гӏалгӏайчен Кулгалхочун балха лоархӏаме хаттар да. Хӏара вахархочунга кхоачаш хила еза лакха технологеш йола, дика спортивни майдаш. Из болх дӏахо а дӏахьоргба.
