ГӏалгӀайче кийчо еш я палестинера бераш тӀаэца, Ӏомаде
ГӏалгӀайчен кулгалхочо Келаматанаькъан Махьмуд-Ӏаьлас хоам бир, вай мехка Палестинера дена 80 бер тӀаэца а Ӏомаде а дика таронаш хиларах. Из хоам бир «Сердало» газетага ГӏалгӀайчен Кулгалхочун, Паччахьалкхен зарбан болх лелабераша.
«Тов бетта 2-ча дийнахьа денз, Палестинера бехача наьха бераш цхьоалагӀча классера лакхарча классашка кхаччалца йолча шин ишколе дешаш хургда. Бераш Наьсаре дӀанийсдаьд, цигарча ишколашка»,-йоах хоамо.
Келаматанаькъан Махьмуд-Ӏаьлас белагалдир, цхьа ха яллалца бераш эрсий мотт Ӏомабеш хургдолга. Дешара шу хьатӀадалехь, цар ах шера меттацара хьал довзаш кийчо яьй. Вайцига тешаш ба, берашца цхьана хилча, цар сихагӀа мотт Ӏомабергхиларах.
«Дерригача берашта эшаш мел дола книжкаш, барзкъа, кхыбола гӀирс дӀабеннаб. Из лоархӀаме а да, хӀана аьлча 2022 шера оагӀой бетта денз, ГӏалгӀайче ва Газера веха вайцига хьавена 180 саг , царех 70 совгӀа бераш да», - йоах хоамо.
