Къаман пандарех йолча Ерригача Россе фестивалага кийчо еш ба мехка
Ерригача Россе моттигашка дӏахьош йолча къаман пандарех йолча фистивалага кийчо еш ба тахан вай мехка. Россе къамий цхьоагӏон Шера хетаяь йола из йоккха кхетаче дӏахьоргья Ставрополе, укх бетта 29-ча денгара 31-ча денга кхаччалца.
Вай республикан мукъама оаз йовзийтаргьяр я Магӏалбика кхален культуран Двореце болх беш йола «Лоаман оаз» яха ансамбль, кулгал деш Байсахаровгӏар Мадина йолаш. Белгалде деза, из тоаба вай мехка дикка цӏихеза йолга.
«Къилбаседа Кавказера, Россе Къулбехьера 12 моттиг я йоккхача фестивале шоай говзал гойтаргьяраш. Къаман юкъе леладеш дола пандараш хьадеш бола говзанчаш а хургба цига дакъа лоацаш. Вай мехка лелаеш йола хӏамаш дӏайовзийта, начӏал дӏахьокха аьттув ба цига.
Къилбаседа Кавказа культуран оагӏонца лоархӏаме, боккха болх ба ала дезаш кхетаче я дӏаяхьа лерхӏар. Вай мехкара цига йодача тоабан хьалха хургья РДНТ исбахьален оагӏонцарча балха кулгал ду Абдурзаканаькъан Аьсет», - дийцар «Сердалога» мехкарча къаман кхоллама Цӏен хьалха латтача цӏихезача культуран болхлочо Зурабанаькъан Ахьмада. Президентски ганзо хьаллоацаш, йоаржаеш я из проект.
«Керда доазув» яха вахара-культуран оагӏонцара Ганз я фестиваль вӏашагӏъеллар. Кечам беча дакъа лоацаш ба Поленов Д.В. цӏерах дола Российски Паччахьалкхен кхоллама Цӏа, Ставрополера культуран гӏулакхех йола министерство, Ставрополера къаман кхоллама Цӏен болхлой. Таханарча Россе вахаре боккха, лоархӏаме болх ба боаржабер.
