РФ экономикан хьал доаржадарах йолча Министерствос кхетаче дӀайихьар, ГӀалгӀай республико моттигера вахара хьал тоадарах дувцаш
РФ экономикан хьал доаржадарах йолча Министерствон кулгалхочун гӀонча волча Назаров Сергейс кулгал деш, Магасе дӀайихьача кхетаче дийцар, республикерча вахара-экономикан хьалах. Къамаьла юкъе дийцар ЖКХ, тока оагӀон хьалаш тоадергдола программа юкъеяккхарах, экономикан хьал айдергдола проекташ йоаржаярах, «Магас» аэропорте доккхий хувцамаш юкъедоаладеш болх дӀабахьарах, иштта кхыдарех а.
Из хоам «Сердало» газетага бир Мехкадаь, Паччахьалкхен зарбан болх лелабераша.
«ЖКХ оагӀонца, къаьстта нахагара ахча хьагулдарах долча гӀулакхаца дувзаденнарех дийцар кхетаче. Белгалдир, хих хьагулдаь ахча 141,9 млн сома тӀа латтилга. ДӀадаха шу хьаийцача, 66 млн дукхагӀа хул из», - йоах хоамо. Назаров Сергейс белгалдир, ЖКХ оагӀонца дувзаденнараш тоадеш санна, бахархой ханнахьа ахча дӀатела безам хургбола болх дӀабахьа беза, аьнна, хӀана аьлча хьагулдеш дола ахча цу оагӀонца дувзаденнарашка болх дӀахьош дӀадода. Вахара-экономикан хьал лакхача боараме оттадергдолча гӀулакхех дийцар гулбеннараша. ТӀехьара массехк шу аттачарех хиннадеце а, дикка толамаш даха аьттув баьннаб мехка цу оагӀонца. Къаьстта йоккха терко йир аьттув луш йолча 5 проекта, царна хьалха лаьттача 11 проекта. Уж йоаржаяра тӀехьа 22,3 млрд ахча хьахьожаде лерхӀ. 1000 совгӀа болча бахархошта болх бе моттигаш лургья цу гӀулакхо дегӀадоаладича. «Ӏарамхи» курорт, аэропорт тоаеш дӀабахьа лерхӀача боккхача балхах дийцар кхетаче. Къамаьла юкъе теркалдир, вахара-экономикан хьалаца дувзаденнараш тоадара тӀехьа федеральни оагӀоно лоаттадеш дола новкъостал.
