ГӀалгӀай мохк хьалха ба, кхаь къаман проектах дола ахча карадерзадеча
ГӀалгӀайче, баьццара дакъа оалача, дикача хьалий моттиге я РФ Минфина баьча тохкамга хьежача, керттера къаман кхо проект кхоачашъярах: «Хьинаре дӀаьха вахар», «Вахара хьалаш», «Экологи». Цо хьагойт, царна хьахьожадаь ахча нийса дӀа а дохийташ, проекташ дика кхоачашъеш хилар, аьлар мехка Кулгалхочун, Паччахьалкхен зарбан болх лелабераша.
ДукхагӀа толамаш даьха моттиг я ГӀалгӀай мехка «Экологи» яха проект, цига 53,7% болх баь баьннаб; из, Россе гӀолла дӀалаьрхӀача, юкъерча боарамал (16%) лакхагӀа да. Дика кхоачашъеш я «Хьинаре дӀаьха вахар» яха проект, цун юкъера хьокхам ба 52,6% (РФ гӀолла юкъера хьокхам - 27%).
«Вахара хьалаш» яха программа кхоачашъяра бола боарам а 18% ба, из Россе юкъарча боарамца нийслуш ба.
Укх наькъа, цу кхаь проекта ГӀалгӀайченна хьахьожадаьр 4,2 миллиард сом да, царех 857,6 миллион дӀадахад, из да юкъера дӀалаьрхӀача 20%.
Хьалхашка оттадаь декхараш шоай ханнахьа а дика а кхоачашдеш хиларо таро лу наьха вахара хьалаш тоаде, иштта мехкашта юкъера къаман проекташ кхоачашъеча даькъ тӀара шоай моттиг чӀоагӀъе.
