Хий чулоацаш, цӏендеш йола моттиг хьалъяра болх сихбе лаьрхӏад
Эса тӏарча хий чулоацача моттига, Шолжа шахьарерча хий цӏендеча моттига болх ма хулла сихбе лаьрхӏа ба мехка. Цу гӏулакха эшаш дола ахча, гоа ца деш, хьалулга дувцаш ба Россе гӏишлошъяра Министерствоца.
«Цу моттигашкара болх дика дӏабодаш ба ала йиш я тахан. Эшаш дола ахча ма хулла сихагӏа хьакхаьчача, йиллача ханал хьалхагӏа чакхбаккха аьттув хргба из болх. Каст-каста цу моттигашка водаш, балха тӏахьожам лоаттабеш ва со. Мехкарча бахархошта из болх ма хулла чехкагӏа чакхбалар мел лоархӏаме да кхетаду вай тахан, цунга хьежжа наьха хьал аттачахьа даккха гӏерташ къахьегаш ба хӏара денна.
Вай республикан хӏама тоадара тӏехьа оагӏув хьаллоацаш, гӏо лоаттадеш хиларах, доккха баркал оал аз Россе Президента, Паччахьалкхенна. Республикан кхоаненна чӏоагӏа лоархӏаме йола проекташ йоаржае аьттув боал вай, тахан гӏо деш хиларах. Мехкарча бахархой хьал аттачахьа доаккхаргдолча проекташцара болх ма хулла тоабара, сихбара тӏехьа къахьегаш хургда дӏахойодача хана а», - язду вай мехкадас Келаматанаькъан Махьмуд-ӏаьлас ший Телеграм-оагӏон тӏа.
Гуш да уж моттигаш вай къаманна мел лоархӏаме я. Хица дувзаденнараш боаггӏача боараме тоадар, цу оагӏонцара наьха вахарера кхоачамбоацараш юстардахар эггара керттерча гӏулакхех да тахан.
