«Из духхьал ахчанцара гӀо хинна Ӏац; вай майра, денал дола бӀухой лархӀар, цар сий массахана лакха лоаттадар, оагӀув хьаллацар да из»,- белгалдир Мехкадас.

Цул совгӀа, мехка 20 оагӀонца новкъостал лоаттаду тӀема операцен доакъашхошта. Цу юкъе да балха отташ гӀо дар, дарбанче чакхвалар, деша отташ новкъостал дар, ЖКХ оагӀув, лаьттан дакъа далар, Ӏаьдала йоал тела ца езаш мукъабалийтар; мах бала ца безаш, берий беша бераш дӀачудалар.

«ТӀема операцен доакъашхой, цар дезалий вахара гӀулакхаш аттачахьа даха гӀерташ, тхоашта могар ду оаха», - тӀатехар вай Мехкадас. «Даьхен Лорбой» яхача мехкарча филиало хӀара денна цу наха эшар тохк, цар хьашташ кхоачашдеш къахьег, вахар хаьдача бӀухой дезалашта терко лоаттаю.

Даьхен гӀулакха латтарашта, цар дезалашта мел дезачунга хьожаш, хӀара денна новкъостал лоаттадергда паччахьалкхено.