Ерригача Россе фестивале, гойтаргья лоамашкара Хьарп
25.04.2024 09:06
Ахкан хьалхарча бетта, 13-ча денгара 15-ча денга кхаччалца, дӀахьоргья Тюмене «Архитектуран тӀехьале» яха ерригача Россе фестиваль.
«Культуран тӀехьален моттигаш лораярах, дикагӀа йола проект» яхача оагӀонца, гойтаргья лоамашкара вай гӀалаш ягӀа моттиг, Хьарп. Из хоам «Сердало» газетага бир ЖӀайрахьа кхален администраце.
Матенаькъан, Ӏамарханаькъан лоархӀаш я Хьарп яха моттиг. Цун доазон тӀа ягӀа 13 метр йола тӀема гӀала, бархӀ нах бахаш хинна гӀалаш, диъ малхара каш. ГӀалаш меттаоттаеш болх дӀабихьаб цига дӀадахача шера.
Проект дӀахьош къахьегараш – «Сафмар», «Меттаоттадар» яха гӀо деш йола ганзаш.
