Токмакски кхален гIо лоаттадеш ба вай мохк
29.10.2025 15:29
Токмакски кхален моттигашка телхараш меттадоаладеш боккха болх дIахьош, къахьегаш ба вай мехкара цу оагIонцара болхлой. Укх наькъа, Виноградни оалача юртарча фельдшерско-акушерски пункте шелал лоаттаю гIирсаш оттадеш хилар уж. Из хоам «Сердалога» бир мехкарча гIишлошъяра балхех йолча Министерствос.
БоаггIача боараме гIишлон чу температура лоаттаеш хургда уж гIирсаш. Цу чу болх берий хьал а, унахой хьал а дикка аттачахьа доаккхаш ба из болх.
Цул совгIа, молхашта а чIоагIа лоархIаме да йоаггIаш йола шелал-йIовхал лоаттае йиш хилар.
«Юртарча дарбанчешкара болх боаггIача боараме хилийтара тIехьа эшаш да уж хувцамаш», - белгалдир моттигерча министерстве.
