«Довзар. Дезар. Доаккхал дар!» яхача проекта юкъе, хьалхарчар мугӏарашка я вай республика
«Довзар. Дезар. Доаккхал дар» яхача Ерригача Россе проекта юкъе дакъа лоацаш, дикка белгалъяьннарех я вай республика тахан. Мехкарча 89 моттига юкъе йиълагӏа моттиг яьккхар вай. Россе чӏоагӏагӏа, дикагӏа долча итт доазон юкъебахар вай мохк, керттера совгӏат кхоачаш. Цу аьттонга гӏолла, «Гобаккхарал доккхагӏа» яхача Роскагирхой проектагара сертификаташ луш белгалбир доакъашхой. Россе моттигашка гӏолла, мах боацаш, гобаккха йиш йолаш ба уж хӏанз цу сертификаташца.
«Вай мехкарча тоабо котало яккхар дикка кийчо ярца, кагирхой юкъелоацаш болх дӏабахьарца, моттигерча говзанчаша къахьегарца дувзаденна да. «Довзар. Дезар. Доаккхал дар» яхача проекто Даьхен лоархӏаме, йӏаьхий моттигаш кердача тайпара йовзийт доакъашхошта; истори, ӏадаташ, культура йовзаш; кхетам, гобаккхар, къахьегар шоайла вӏаший хотташ», - дийцар «Сердалога» мехкарча кагирхой гӏулакхех йолча Комитете. Вай республикера кагирхой тӏатеӏӏа къахьегаш болга хьагойтар федеральни оагӏонца котало яккхаро. Боккхача мехка дуккхача моттигашта юкъе белгала хилар, Даьхен хӏама тоадергдола керда наькъаш хьаделлар да.
