Пхьарчанаькъан Мухьмада хетаяьча яхьан тӏехьарча дийнахьа, 5 майдилг яьккхар вай спортсменаша
21 шерга кхачанза барашта юкъе дзюдох йола ерригача Россе яхь дӏайихьар вай мехка. Халкъашта юкъерча спорта воккхача говзанчанна Пхьарчанаькъан Мухьмада хетаяь яр из. Яхьан тӏехьарча дийнахьа, пхи майдилг йоаккхаш, белгалбаьлар вай спортсменаш. 55, 60, 66, 73 кг дозалашка белгалбаьлар вай кагирхой.
«Шиъ дошо, шиъ дото, цаӏ борза майдилгаш яьхар вай дзюдоисташа, цу яхьашка лакха говзал гойта. Лакхерча лагӏа тӏа эттар Кхоартой Мухьмад, (60 кг), Къамурзой Ахьмад (73 кг); дото майдилгаш ӏоэхкар Къоастой Омара (73 кг), Мужухой Ислама (66 кг), хӏаьта 60 кг дозал долчарна юкъе белгалваьннача Хоаной Мухьмада борза майдилг кхаьчар.
Коталонга кхоачаш белгалбаьнна кхыбараш: Москвера дзюдоист Тагаев Махач (66 кг), Гӏаьбартой-Балкхарой мехкара Конов Алим (55 кг)», - дийцар «Сердалога» мехкарча цу оагӏонцарча министерствон зарбан болх лелабераша.
Магасерча Йовлой Берда цӏерах долча спорта цӏагӏа хилар яхьаш. 2027-ча шера мехка дӏаяхьа лерхӏача йоккхача яхьашта юкъе нийсвала ловш вола, Россе моттигашкара 200 совгӏа спортсмен вар цига гулвеннараш.
