Гӏалгӏайчено ший таронаш йовзийт, кхыча паччахьалкхений викалашта
ОАЭ, Саудовски Аравера, Малайзера, Узбекистанера хьаьший баьхкар Гӏалгӏайче «Мах беча викалий кӏира» яхача Россе Минпромторга ерригроссийски хьала чудоагӏаш. Бизнеса викалаш, мах бара даькъ тӏара атташеш баьхка хиларо чӏоагӏду Къилбаседа Кавказаца цхьана гӏулакх леладе безам болаш уж хилар. Промышленноста, Гӏалгӏайче таьрахьашца дегӏаахара Министра Татренаькъан Мухьмада кхыча паччахьалкхений викалашта йовзийтар моттигерча хӏама кхолларий таронаш, терко тӏаяхийтар экологически цӏена ахархой кхача, гӏишлон материалаш хилара.
«Хьаьший хилар йоккхагӏа йолча «Гӏалгӏайчен Йоккха Сомий беш» ООО агрохолдинге, «Шолже ахархой моттиге», «ТИМ» ООО кердадарий заводе, «РИАЛ», «РИАК» яхача промышленни предприятешка, «Ачалкх» ОАО, иштта «Тӏой-Ютаръяр» оала теплица йолча. Терко тӏаяхийтар хӏама арахецаш дӏабодача низа, иштта культуран-исторически хьала: викалашта лаьрхӏа экскурси йир дагалоаттама, сийлен Аллее, цо таро елар кхыча мехкара баьхкача хьаьшашта кӏоаргагӏа довзийта гӏалгӏай къаман ӏадаташ.
Юххера а, болх чакхбоаккхаш, кхетаче дӏайихьар Татренаькъан Мухьмада кулгал а деш. Цига дакъа лоацаш бар Саудовски Араве, Вӏашагӏтехача ӏарбий Эмиратий, Малайзе, Узбекистана викалаш. Кхетаче дӏахьош дакъа лаьцар мехка экономически дегӏаахара министра Гийренаькъан Исроапила. Дийцар инвестицей проекташ юкъеяхарах, паччахьалкхено тахан деш долча новкъосталах, иштта мехкал арахьарча экономически балха керттерча хаттарех»,- аьлар «Сердало» газетага Гӏалгӏайчен Паччахьалкхене.
Кхыча мехкара баьхкача викалаша лакха мах оттабир Гӏалгӏайчен таронна, цу юкъе цар белгалдир моттигера хӏамаш дикал лакха йолаш, предприятеш боккха пайда луш хилар, уж Юхерча Малхбоален, Къилбаседа-Малхбоален Азе базарашка лоаттаяра гаьна йоацаш, аттача моттиге хилар а белгалдир. Къамаьла юкъе керттера дар экспорт дӏайолаяра хьалххе а дийца дош. Оагӏонаша барт бир гӏалгӏай сомий, баьцадаарий продукци, экологически цӏена лоамара минеральни хий, тахан эшаш йола гӏишлон материалаш царна лоаттае.
