Соче дӏайихьача Россе яхьашка белгалбаьлар вай панкратионисташ
Соче дӏайихьача Россе чемпиоанате дикка белгалбаьлар вай панкратионисташ. Из хоам «Сердалога» бир спорта гӏулакхех йолча министерствон зарбан болх лелабеча Гӏаппархой Аишас.
«51 моттигера 300 совгӏа спортсмен вар Соче гулвеннараш. Вай мехкарча спортсменашта йиъ дошо, 4 дото, 3 борза майдилгаш ӏоэхкар цига.
Геттара белгалбаьннарех хилар Овшанаькъан Темарлан, Иленаькъан Ясир, Овшанаькъан Ислам. Укх шерарча лайчилла бетта Стамбуле дӏаяхьа лерхӏача дунен чемпиоанате дакъа лоацаш хургба уж.
Шоллагӏча лагӏа тӏа эттарех ба Хамхой Адам, Хьажкӏанаькъан Мурад, Йовлой Азамат, Дзейтанаькъан Апти. Мехкарча гулъяьча тоабанна юкъе хургба уж. Борза майдилгаш яьхарех бар Ужахьанаькъан Заьлмаха, Цхьорой Аслан, Тӏумхой Джамалейла», - дийцар тха газетага.
Гаьгенаькъан Башир тренер вола тоаба кхоалагӏа моттиг яхьаш цӏенах кхийтар.
