ЧӀоагӀа бӀарг тӀаотташ хийтар вай мехкара ковнаш ГӀаьбартой-Балкхарой мехкарча ахархой блогера
Республикал а араяьлар «ДикагӀа бола доалахьара боахам» яха яхьаш. Лоалахарча мехкашкарча наха теркалдир из гӀулакх. Царех цаӀ ва, гӀаьбартой мехкара ахархой блогер Теунов Мурад. «Юртара вахар» яхача ший программе керда оагӀув гойта вера из вай мехка.
Из хоам «Сердалога» бир паччахьалкхен зарбан болх лелабераша.
«ГӀалгӀай мехкарча моттигаша санна, боккха тоам бир са дега бахархоша а. ЦӀена, хоза доал деш латт ковнаш, массанахьа лостам болаш, дог хьоасташ я. Шоаш леладеча хӀаманца чӀоагӀа лерхӀам болаш, хьаша лакха лоархӀаш бола нах ба массанахьа», - аьлар Мурада.
Тайп-тайпара, цхьадола, тӀакхача хала долча моттигашка дада боахамаш долча ше кхувларах, баркал аьлар кхыча мехкарча хьаьшо вай юртбоахама гӀулакхех йолча Министерствонна. «PROАгро СКФО» гойтам-кхетаче кийчъеча дакъа лоацаш волча Мурада вай мехкара ше хьаийцараш цига гойта лерхӀ. Гойтам дӀахьоргба хьатӀабоагӀача бетта.
2021-ча шера денз дӀакхухьаш я вай мехка доалахьарча боахаме къахьегарашта юкъера эггара толашагӀбараш гучабоахаш йола яхьаш.
Укх шера диазлагӀа дӀайихьар уж. Цу юкъа, хьалха 192 хиннараш 570-га кхоачаш ба тахан, хӀаьта, белгалбаьннарашта луш дола ахча цхьа миллион сомага кхаьчад.
