Къахьегама ярмарке дакъа лаьцар республикан психиатрех, наркологех йолча кердача моттиго
ДӀадахача кӀира мехка дӀайихьача «Россе болх. Аьттон ха» яхача балха моттигаш Ӏалашъеча ярмарке дакъа лоацаш хилар республикера, укх бетта 12-ча дийнахьа хьайийлла психиатрехи наркологехи йола моттиг.
Вайна ма харра, ярмарке болх лохаш барий аьттув ба болх бе моттигаш луш барашца вӀаший юхьдухьала къамаьл де. Дашха безам болча моллагӀча хаттара жоп корадергда царна цига.
«Психиатрехи наркологехи йолча моттиго къахьега шортта балхаш лу бахархошта - лораш-психиатраш, психиатраш-наркологаш, лорий йижарий, иштта кхыбола болхлой эш цига тахан. Эшаш мел болча кхоачамца тоаяь йолча цу моттиге, боаггӀача боараме шоай болх дӀабахьа аьттув хиларал совгӀа, шоай балха тӀа лакхбала а вӀаштӀехьадаргда цар», - дийцар «Сердало» газетага унахцӀенон гӀулакхех йолча министерстве.
