Гӏалгӏай драмтеатро кийчбу дешархошта лаьрхӏа гӏалгӏай меттала фаьлг-спектакль
Гӏалгӏайчен, Боазаркъанаькъан Идриса цӏерагӏча Паччахьалкхен драматически театре хургья керда къаман спектакль. Режиссёра Галай Мурата сцена тӏа йоаккх цӏихеза Казиев Шапе, «Насреддина дошо вир» яха спектакль, цига турпалхой гӏалгӏай меттала къамаьл деш хургба. Карарча хана из спектакль-фаьлг хьакхоллаш къахьегаш ба кхоллама болхлой.
«Цун сюжето дувц Насреддинах лаьца беламе дувцараш, из ва ший паччахь ӏехаваь, шийна езаш йола йоӏ Фатима кӏалхаръяккха езаш. Дика ка йоалаш волча Насреддина карагӏдоал гонахьарбараш тувла а баь, дагадоаца хьал хьакхолла. «Насреддина дошо вир» - из дег чура бола белам ба, кӏоаргга маӏан долаш. Беламга гӏолла хьагойт саг гӏалатвалар, цӏаьрматал, шийна пайда бича кхы сагота воацаш хилар. Цо берашта хьалхадоаккх, хьаькъал долаш, хӏамах кайоалаш хиларо духьалъотта новкъостал делга», - аьлар «Сердало» газетага Паччахьалкхен драматически театре.
Кердача спектакла театра репертуар хьалъюзаргья, Гӏалгӏайчен юкъарча дешара моттигашта лаьрхӏа. Из фаьлг а иштта лаьрхӏа ба дешархошта масал далара, цар дика-во къоаста дергдолаш. Иштта царна гӏалгӏай мотт хозаргба театре, цигара хьаэцаргда вахаре лоархӏаме дола культуран мах бараш.
