Дунен яхье дакъа лаца бокъо яьккхай дзюдоиста Малсаганаькъан Мухьмада
Россе регионашкара толашагӏа бола дзюдо ветеранаш гулбенна, чемпионат хилар Ульяновске. Вай мехкахо Малсаганаькъан Мухьмад дикка белгалваьлар цига. 100 кг дозал дарашта юкъе котало яьккха, лакхерча лагӏа тӏа ваьлар из.
«Цу яхьашка коталонга кхачарах, дунен чемпионате дакъа лаца йиш йолаш хургва вай мехкахо. Сараево яхача шахьаре, тов бетта 20-ча денгара 24-ча денга кхаччалца, дӏахьоргйолча халкъашта юкъерча яхье Россегара дакъа лоацаш хургва вай мехкахо», - йоах «Сердалога» цу оагӏонцарча моттигерча министерствера кхаьчача хоамо.
Дунен, Россе ветерански дзюдо дикка белгалваьннарех волаш, хьавоагӏарех ва Малсаганаькъан Мухьмад. Укх наькъа а массанена бӏаргадайра из лакха говзал йола спортсмен волга.
Кхозза Россе чемпион, иштта дунен чемпион хилар цох хьалхагӏа. Боснеи Герцогивинеи хургйолча яхьанга, беррига низ ураоттабаь, кийчо е езаш ва вай мехкахо тахан.
