Керда гӀишло эшаш да тахан гӀалгӀай кагирхой театр
БоаггӀача боараме болх дӀабахьа аьттув бехкаш я тахан, ГӀалгӀай паччахьалкхен кагирхой театро къахьегаш йола гӀишло. Лакха начӀал долча артисташа боккха болх дӀахьоча театра лерттӀа къахьега аьттув луш йола гӀишло эш. Цох лаьца хьоахадир вай Мехкадас Келаматанаькъан Махьмуд-Ӏаьлас ший телеграм-оагӀон тӀа.
«Тай-маха» яха хӀамаш тега фабрика чухиннача гӀишлон чу ба тахан театра болхлой къахьегаш. Хьал аттачарех деце а; эрсий, доазол дехьарча классикий, иштта вай къаман драматургий балхаш гойташ 30 совгӀа спектакль оттаяьй говзача актёраша.
2025-ча шера 44 кхетаче, 2 спектакль кийчъе лаьрхӀа ба кхолама болхлой. Чурча, арарча моттигашка хьежа; вай Мехкадас белгалдир, эггара керттера кхоачамбоацар хьажархой зал, шоай сцена цахилар долга. Шахьарерча культуран цӀагӀа дӀакхухь цар тахан шоай болх, хӀаьта цу гӀулакхо боаггӀача боараме дӀадахийтац театра гӀулакх. Соцам бир, ма хулла сихагӀа театра хьал тоаде. Цу оагӀонцарча болхлошта тӀадиллар мехкадас Келаматанаькъан Махьмуд-Ӏаьлас цу гӀишлон чу малагӀа хувцам бича дикагӀа хургда тахка, аьнна. Технически экспертизо хьахьокхаргда, из гӀишло тоае еза е кердаяр хьалъе еза. Керттера декхар - артисташа шоай болх боаггӀача боараме, хало йоацаш, дӀакхухьаргбола хувцамаш дар, хьажархой каст-каста спектаклашка хьажа аха безам хургболаш лерттӀа зал хилийтар.
