ЦIи ялар тохка ГIалгIайчен лаборатори СКФО дикагӏчарех лаьрхIай
Гӏалгӏайчен тахкамаш ду цӏи яларах йола лабораторе дика толам баьккхар Халкъашта юкъерча профессиональни говзал гойтача яхье, цо яьккхар Даькъастен федеральни куран судий-кхелахой урхалленашта юкъе хьалхара моттиг. Балхаца ювзаенна яхьаш дӏайихьар Волгограде. ДикагIчар цӏи яккхара яхьебаьлар Даькъастен федеральни куран дикагӏа бола говзанчаш.
«Яхь дӏахьош кхаь дийнахьа къовсабелар «Дикагӏа йола суда-кхелахой ФПС ГПС Урхалле» яха, иштта «Дикагӏа вола суда-кхелахой ФПС ГПС урхаллен болхло» яха цӏи яккхара тIехьа. Из программа хилар бахьан долаш, доакъашхой таро хилар шоашта ховр гойта, балха говзал эца, цӏера кхелахой юкъара балха боарам лакхбе»,- аьлар «Сердало» газетага Гӏалгӏайчен чоалханеча хьалий боахаме.
Яхьаш дӏахьош доакъашхоша гойтар цӏера-технически кхелахочун даькъ тӏа хила дезарех бола кхетам, иштта чоалхане декхараш кхоачашде ховш хилар.
Цига дика толам баьккхар Гӏалгӏайчен викалаша. Эггара лакхара моттиг яьккхар тахкара лабораторе тоабо, иштта котало яьккхар суда экспертиза воккхагӏа волча кхелахочо Темербенаькъан Руслана, цох мехка дикагӏа вола говзанча хилар.
Белгалду, из толам баккхар цаховш нийсденна хIама дац. Тохкама болх бу Гӏалгӏайчен лаборатори укх массехк шера а Даькъасте хьалхарча моттиге я. Россе МЧСа цӏера духьаларча федеральни суда-кхелахой урхаллен керттера лоархӏаш йолча лабораторе ӏалашо лоаттаю моллагӏа дола цӏерца дувзаденнача хӏаман бахьан гучадоаккхаш.
Аргӏанара котало яккхаро хьагойт цигара къахьегамхой шоай балхах дика кхеташ хилар, ӏилман-технически хьалхале лелаю оагӏув юкъеяккхара из кийча хилар, иштта цахаддаш лакха толамаш доах цо хӏара денна дӏахьоча балха тIа.
