Гӏалгӏайчен изберкомо тов бетта дӏахьоча хоржамий болх чӏоагӏбир
Гӏалгӏайчен избиркомо лаьрххӏа чӏоагӏйир РФ, республикан Халкъа Гуллама хоржамаш дӏахьош йола ха. Цо хоадам бу цу гӏулакха чуйоагӏача компаней балха де дезачун. Хоржамаш дӏахьоргда 2026 шера тов бетта кхаь дийнахьа - 18,19, 20. Цу деношка хоржамхоша кхадж тоссаргба федеральни парламента, Гӏалгӏайчен законаш кхолла депутаташ хоржаш.
«Хоржамашка кийчо яр - из республикан бахархошта хьалхашкара бехктокхам ба. Вай декхарийла да хоржамаш паргӏатта дӏадахьара де дезачунга кийчо е. Ӏаьдала хоржамий кхелаш, еррига цу юкъе дакъа лоацаш мел йола республикан моттигаш шоайла бувзам болаш болх беш я, из лоархӏаме гӏулакх дика дӏадахьара», - аьлар Келаматанаькъан Махьмуд-Ӏаьлас.
Паччахьалкхен Думе хургбола Гӏалгӏайчен депутаташ хоржаргба вӏашагӏъийнача кепара. Республике чӏоагӏъяьй Гӏалгӏай цхьан мандатах йола №16 лелаю кхадж тосса моттиг, цудухьа наха шоай оаз дӏалургья цхьатарра партийни спискашта а, хоадам болча кондидаташта а цхьан мандатах.
Республикан Халкъа Гуллама хоржамаш дӏахьоргда лаьрххӏача наькъах, цига доакъашхошта юкъеяргья 32 депутатий моттиг.
Хоржамий даькъ тӏа, моттигерча бахархошта кхо бюллетень хьалургда, №16 йолча цхьа мандат долча куран, иштта цаӏ йолча республикански куран федеральни юкъарча списках кхадж тассара.
