Коталон 80 шу дузаш, «Къилбаседа Кавказа россеташ» дакъа лоацаш хилар, ГӏалгӀайчен сийленгаш тоадеча

Цар терко тӀаяхийтача моттигех цаӀ яр, МагӀалбика Дагалоаттама, Сийлен кквер. Из сийленг-гӀишло хетаяь я «Тӏема сийлен шахьар» лораеш лаьттача салташта. Цу юкъе латт советски салтечун гӀов. Аьтта бе йоалл автомат, аьрда бе - моастагӀчун герзах лоравеш дола аьшка турс. ХьалтӀавоаллача яздаьд: «Даьхе бахьан бейнача магӀалбикахошта». Цун кӀалха Даим йоаца цӀи я. Сийленг хьалдаьча доазонна гонахьа мемориала дакъа да, бейнарий цӀераш тӀайолаш. Укхаза дӀавелла воалл 796 МоагӀалбик лораеш хинна салте. Верригаш а Сийлахь-боккха Даьймехка тӀом латташ цига веннараш 120 эзар салте ва, цу юкъе эпсараш а болаш.

Энергетикаша сийленг цӀендир, дохадаь, дикача кхерах даь улг а хийцар, цу тӀара цӀераш кердаяьхар. Даим йоагача цӀера гом а басарца кердабаьккхар.

«Вайх хӀаране доаккхал де деза 80 шу дузаш долча цӀайна юкъе дакъа лаца таро хиларах. Из да вай а вай тӀехьен а кхоане лораеш, кортамукъале йоаккхаш бейнарий сий деш хилар. Царна карагӀдаьнна турпалал яздаьд дошоча алапашца, шоай Даьхе бахьан долаш вахар дӀаденнарий цӀераш вай дегашка хургья даим»,- аьлар «Ингушэнерго» филиала кулгалхочо Котаганаькъан Кимрана.

Дагалоаттама моттигаш тоаяр, патриотически болама цхьа оагӀув хинна Ӏац, республикерча энергетикаша хьаллаьцарех. Укх деношка, «Къилбаседа Кавказа россетий» викалаша, Коталон Ди долаш, Российски Федераце Турпалхочун, воккхагӀа волча лейтенанта Къоастой Ширване цӀи малхаяьккхар, МагӀалбика кхален керттерча ток лоаттаеча цхьан центрах цун цӀи тилларца.