Мехкада: Гӏалгӏайчен викалаша мохк дика бовзийтаргба кагирхой фестивале
Екатеринбурге дӏахьош я Халкъашта юкъерча кагирхой фестивала кхетаченаш. Из хургда тов бетта 17-ча денга кхаччалца, цига дакъа лоацаш ва 191 паччахьалкхен 10 эзар викал. «Сердало» газета хьалха яздаь ма-хиллара, царна юкъе Гӏалгӏайчен 23 викал ва, уж яхьах дика чакхбаьлар, цудухьа цига баха аьттув а хилар. Гӏалгӏайчен викалаш ба къонабараш, дешара, ӏТ-технологей, бизнеса, масс-медиа, спорта, вай заман хьалаш леладара доакъош тӏара.
«Фестивала къаьстта йола терко лоаттаю Россе Президента. Ше доакъашхошка къамаьл деш цо белгалдир халкъашта юкъе доттагӏал, лархӏар долаш, шоайла кхеташ хила дезилга. Вай кагирхошта из лоархӏаме да, иштта йоккхий таронаш а я - юкъарлон вахаре цхьа дакъа дӏалоацаш хилар, шоашта керда таронаш хьаеллар, тайп-тайпарча мехкара баьхкача нахаца бувзам лелабар. Тахан вай кагирхой дакъа лоацаш ба «Дунен кагирхой болама» юкъе. Къаман гӏирс тӏабувхаш, уж гӏоргба Екатеринбурга урамашка гӏолла, гӏалгӏай къаман культура, ӏадаташ гойташ. Цу тайпара кхетаченаш лоархӏаме я Гӏалгӏайчен шийна а. Кагирхой дӏагойташ ба вай республика, цар кхыча доакъашхошта йовзийт вай культура, истори, иштта царна нах бовз, царца бувзам хотталу, из тӏехьагӏа укхаза, вай мехка, накъабоалаш хул. Сога хаьттача, из чӏоагӏа лоархӏаме да, вай кагирхой цу таронашта юстара цахилар. Тахан мехка кагирхой эшача моттиге хила еза Гӏалгӏайче а, цига хотталу тайп-тайпара культураш йолча наха юкъера къамаьл», - аьлар Гӏалгӏайчен кулгалхочо Келаматанаькъан Махьмуд-Ӏаьлас.
Республикан кулгалхо тешаш ва, Гӏалгӏайчен викалаша цига вай республика дика гойтаргхиларах. Цигара цар дахьаргда, мах бола балха говзал санна, тахан эггара чӏоагӏагӏа эшаш дола хьаькъал, нахацара бувзам, кердадараш. Уж накъадаргда Гӏалгӏайчен социально-экономически проекташ кхоачашъеча.
