Мехкада: 17 шу хьалха хиннача унзарча хатара юкъе, бейнарий цӏераш цӏаккха йицлургьяц
ӏаьржача алапашца белгалдаь латт из ди вай къаман исторе: 17 шу хьалха республике эттар унзара хатар дар. Маьцхали бетта 17-ча дийнахьа, Насарерча РОВД дов дир бӏехача террориста. 25 сага вахар хаьдар цу дийнахьа. Шоай балха тӏа хиннараш санна, юхегӏолла дӏаболхаш хинна маьрша нах бейра цу бӏехача зулама юкъе, 136 сага човнаш хилар.«Из хатар кхы а доккхагӏа хила тарлуш дар ӏаьдала болхлой деналца, майралца духьалъэттабецаре.
«Терроризм яхар эггара бӏехагӏа, доккхагӏа дола зулам да! Вай республико дукха хала денош лайнад. 2004-ча шера ахкан хьалхарча бетта 22-ча дийнахьа эттар унзара хатар, 2009-ча шера маьцхали бетта 17-ча дийнахьа дукхача наьха вахар хаьдар зуламхой карах. Дукхача дезалашка боккха бала, гӏайгӏа кхаьча денош да уж. Бакъда Гӏалгӏайче духьаллаьттар царна! Террористаш яхача бӏехача наьха аьттув баланзар вай мохк бохабе, нах маьршача кхоаненах баха. Тахан вай республике цхьоагӏо, машар, паргӏато я. Деналах, майралах бизза бола къонахий лаьттар цу дерригнена тӏехьа», - белгалдир мехкадас Келаматанаькъан Махьмуд-ӏаьлас.
Декхараш кхоачашдеш, маьрша вахар лорадеш лаьттача хӏара сага цӏи дагайоагӏаш ба тахан мехка. Тӏехьа тӏабоагӏарашта бовзаш хила беза уж нах мел ха дӏаяхарах. Тахан вай мехка дагалоаттама, гӏайгӏан Ди да. Маьцхали беттара 17-гӏа ди вай массане вахаре терроризма духьале яь ди хинна даха дисад.
