Республикан кулгалхочо белгалдир, къахьега тӀера бола, дика кагирхой ураоттабара тӀехьа дешара оагӀоно лаьрххӀа болх дӀакхахьар геттара лоархӀаме долга. Къаман, федеральни проекташ хиларах, тахан керда ишколаш, берий бешамаш, кхыйола берий кхетам лакхбеш йола моттигаш хьалъе аьттув ба вай. «38 ишколе, 2 колледже керда гӀирсаш отткадергда укх шера, иштта таьрахьий дешарах йола керда моттигаш хьаелларгья», - белгалдир Мехкадас.

Мехка кулгалхочо иштта теркалдир вай дешархой лакхерча лагӀа тӀа балар: дошо майдилгаш луш дешар чакхдаьккхар 207 дешархочо, 143 сага дото майдилгаш елар, мехкара 67 сагв. яхьашка чакхваьнна, Россе йоккхача вузашка деша отташ ва. Хьехархой болх лакхача боараме оттабаь, толашагӀа болчарна юкъера 25 саг совгӀаташ денна белгалвир Мехкадас.

Дешара, Ӏилман гӀулакхех йолча Министерствонна хьалхалаттача Цхьорой Ахьмад-Башира ший къамаьла юкъе дийцар хӀара шера хьаеллаш латтача кердача ишколех, берий бешамех, иштта дӀахьош латтача «Таханара ишкол», «Лакхвалара моттиг», «ӀT-куб», «Юртара хьехархо» яхача мехка дӀахьоча программех.