Келаматанаькъан Махьмуд-Ӏаьла: юрташкара хьал тоадара тӀехьа къахьег республике
«Республикан тайп-тайпара кхоачам лоаттабеш йолча вай мехкарча юртий хьал ма хулла тоадара тӀехьа къахьегар, тахан лоархӀамеча декхарех да», - аьлар вай мехкадас Келаматанаькъан Махьмуд-Ӏаьлас. Из хоам «Сердалога» бир мехкадаь зарбан болх лелабераша.
«ТӀадоагӀача шера вай мехка «Юрташкара хьал тоадар» яха программ дӀахохьоргья. ДӀабахьа безача балха юкъе да Галашка Чаненаькъан А. цӀерах йолча санаторена-хьун ишколанна лаьрхӀа керда гӀишло хьалъяр, Южнера 120 бера моттигаш луш йола берий беш йистеяккхар, иштта цу юртара хин хьал тоадар», - йоах хоамо. Цул совгӀа, тоае лерхӀ «ЖӀайрахь» яхача ЗАОга кхаччалца «Заьзгакъонгий-Юрт-Горагорск» яхача наькъагара тӀавоагӀа моттиг; «Булгучанаькъан» яхача КФХана тӀабода Берд-Юртара никъ.
«Юрташкара хьал тоадарах тарра, цигарча бахархой вахара хьал аттачахьа доаккх вай; болх бе керда моттигаш, ишколаш, дарбанчеш, керда дика наькъаш хьадеш», - белгалдир вай Мехкадас.
Келаматанаькъан Махьмуд-Ӏаьлас теркалдир, юрташ, вай къамо тхьовра денз хьадахьа Ӏадаташ хинна дӀаэтта гӀулакхаш лорадеш, уж дӀа ца доалийташ йола моттигаш йолга, цудухьа керте латтарий декхар - уж мах баь варгвоаца гӀулакхаш лорадара тӀехьа къахьегар.
