Мехкада: Гӏалгӏайчен куц кхолл къаман проекташа, туризмо
«Дезал» яхача къаман проектага гӏолла, лоархӏаме хувцамаш деш ба тахан культуран оагӏонца. Цу оагӏонцарча ворхӏ моттига хӏама тоаде, аьнна, укх шера хьахьожадаьр 469 млн сом ахча да. Таханарча дийнахьа, 357 млн сом ахча дӏадохийташ, болх баьб (76,1%).
«Янданаькъан Джамалдий цӏерах йола Къаман библиотека тоаеш хинна болх чакхбаьннарг лархӏа мегаргболаш ба тахан - 99%-га кхоачаш кийча я из моттиг. Наьсарен-Шахьара культуран цӏагӏа болх дӏахьош латт тахан. Цун кийча хилар 66, 5%-га кхоачаш да. Мехкахбаьхача наьха Мемориальни моттиге дӏахьош бола болх 57%-га кхоачаш ба ала йиш йолаш ба. Керда Берий кхоллама ишкол хьалъеш латт Магӏалбике. Из къаьстта лоархӏаме проект я: шоаш бахача моттиге, цӏенна гаьна доацаш, начӏал чӏоагӏде, цхьацца говзал караерзае берашта аттагӏа, паргӏата хургдолаш къахьегаш да вай. Яндарера, Алхастера, Эбарга-Юртара культуран Цӏенош тоадеш болх ба дӏахьош латташ, иштта Гӏалгӏай паччахьалкхен кагирхой театра гӏишло меттайоалаеш боахк. 32%-га кхоачаш ба цигара болх тахан. 2026-ча шера балхашта хьахьожадаьр 87 млн сом рузкъа да. Наьсарерча Берий кхоллама ишкола лаьрхӏа дукха керда гӏирсаш эцаш латт, иштта дешарца эшаш дараш а. Цу оагӏонцара хӏама чӏоагӏдаь латт, дукха ца говш хьакхача езаш я хӏамаш. Малсаганаькъан Тухана цӏерах йолча Гӏалгӏай паччахьалкхен музее доккхий хувцамаш деш боахк тахан», - язду вай мехкадас Келаматанаькъан Махьмуд-Ӏаьлас ший телеграм-оагӏон тӏа.
Къаьстта хьоахадир республикан Кулгалхочо туризм йоаржаярах. Мехкадас теркалдечох, укх шера цу оагӏонца дувзаденнараш меттадоаладе, аьнна, къоастадаьр 30 млн сом федеральни ахча да, иштта 303 эзар сом гаргга ахча республикански ганзера а да. Цу оагӏонца керда моттигаш хьаелларал совгӏа, туристически наькъаш тоаде, таьрахьашца дувзаденнарий гӏулакх меттадоаладе, иштта лоархӏаме кхетаченаш дӏакхахьа, аьнна, хьахьожадаь рузкъа да из. Вай Мехкадас белгалдечох, цу оагӏонцарча гӏулакхаша дӏайовзийт вай республика.
Белгалде деза, республикан хьал хӏара денна хувцалуш, тоалуш латтилга. Хьаеллаш латт бахархошта салаӏа, паргӏатта ха дӏаяхьа аьттув луш йола моттигаш, хьаьшашта лаьрхӏа а дукха керда наькъаш хьадийллад мехка. Тӏехьа тӏайоагӏача къонача тӏехьенга культураца, истореца, бӏаьшераш хьалха денз хьадахьача беркатеча даьй ӏадаташца дувзаденнараш дизза дӏакхачийтара тӏехьа боккха болх лоаттабе аьттув боал тахан республике. Хӏара денна доккхий, лоархӏаме хувцамаш ду вайцига.
