Мехкада: Россе къамашта юкъера бувзам чӏоагӏбеш да, Путина белгалдаь керда денош
Россе Президента Путин Владимира амар денна; дагалоаттама керда ши ди белгалдир вай ханорга юкъе. Бекарга бетта 30-гӏа ди Россе доккха доацача, массахана укхаза даьхача къамий Ди хургда, хӏаьта тов бетта 8-гӏа ди - Россе къамий меттай Ди. Цу гӏулакхо белгалду, къамий культурашца, метташца дувзаденнараш лоархӏаме долга. «Сердалога» из хоам бир Мехкадаь, Паччахьалкхен зарбан болх лелабераша.
«Лоархӏаме, ханнахьа юкъедаьккха хӏама да из. Вай боккхача мехка Россе дахаш долча къамий культураш, истореш, оамалаш мел йӏаьхий я белгалдеш да из, хӏара къаман ӏадаташца лерхӏам хила безилга хьахьокхаш да», - яздир вай Мехкадас ший Телеграм оагӏон тӏа.
Мехка кулгалхочо теркалдир, вай мехка къамий метташта, ӏадаташта, культурашта йоккха терко лоаттаяьлга. «Культуран оагӏон политика хинна ӏац из тахан, вай дерригаш вӏашкаозаш, вайна юкъера барт, безам чӏоагӏбеш дола хӏама да из, цу гӏулакхо ду вай низ болашагӏа а», - аьлар Келаматанаькъан Махьмуд-ӏаьлас.
Керда юкъедаьхача дагалоаттамцарча деношка гӏолла; кхувш латташ йола къона тӏехье мохк, къаман ӏадаташ, мотт, ший культура лоархӏаш хила езилга хьалхадоахаш; ураоттае езилга кхетаду вай тахан. Ноахалашта юкъе бувзам, барт хила беза, массахана вӏаший тӏера долаш, гӏо де кийча долаш хила деза вай.
«Йоккхача Россе хӏама тоадеш, вай дерригаш цхьана хила дезилга белгалдеш, хургда Президента юкъедаьккха керда ши цӏай», - белгалдир республикан хьалха латтача Келаматанаькъан Махьмуд-ӏаьлас барт, безам, цхьоагӏо, яхь лорадеш даха дезилга теркалдеш.
