Мехкада: Республикан хоамий оагӏонцарча вахаре лоархӏаме моттиг дӏалоацаш я НТРК «Магас»
2013-ча шера маьцхали бетта 27-ча дийнахьа, ший болх дӏаболабир Къаман телерадиокомпане. Республикан вахаре лоархӏаме моттиг дӏалоацаш хилар из. Ший хӏама дикка хьаоттадеш, къахьегама никъ хьабена; тахан мехкахой вахаре йизза моттиг дӏалаьца оагӏув ба из. Хӏара денна ший хӏама тоадеш я телерадиокомпани. Цӏихезача журналиста Боканаькъан Шамсудина кулгал деш йолча, лакха начӏал долча тоабо хӏара денна арахецаш латт вай къаман исторически тӏехьаленах, беркатеча ӏадатех, цӏихезача мехкахоех, иштта таханарча Гӏалгӏайчен вахарах дувцаш йола проекташ. НТРК хьакхеллача денца уж даькъалабувцаш хилар вай мехкада Келаматанаькъан Махьмуд-Ӏаьла.
«13 шу яхар – из истори да! Вай мехках, бахархоех, ӏадатех, культурах, кхыдолча гӏулакхех хӏара денна дувцача наьха истори. Республикан хоамий оагӏонцарча вахаре лоархӏаме моттиг дӏалаьца дӏаэттай Къаман телерадиокомпани. Кадра тӏехьашка дусаш да къахьегама дӏаьха сахьаташ, эфираш, вахарера моттигаш дӏаязъяр, командировкаш. Наха тешаме хета телевидени духхьал цу гӏулакхех хьаотташ я. Республикерча телевидене керттера декхар да шерашта юкъера бувзам цабоабар, республикан хӏама шоай низаца тоаде гӏерташ къахьегача нахах дувцар, истори, культура, вай къаман беркате ӏадаташ, иштта вай наьна мотт лорабар», - белгалду Мехкадас телевидене тоаба даькъалаювцаш.
Бехктокхаме, къамах дог лазаш, шоай декхараш кхоачашдеш хиларах, доккха баркал оалаш; могаш, маьрша болаш, иразе, беркатаца баха, керда проекташ кхолла, кхы а доккхагӏа долча толамашка кхачара тӏехьа хьинаре къахьега даькъалабийцар мехка кулгалхочо «Магас» НТРК болхлой.
Мехкадас белгалдир, доккхача исторех, вахарах, таханарча Гӏалгӏайченах, цун культурах, беркатеча гӏулакхех дувцаш йола керда проекташ дӏахойодача хана кхы а дукха цар кхолларгхиларах дог тийша ва ше, аьнна.
«Сердало» газето тахан хьаллоац «Магас» НТРК тоаба даькъалаювцаш мел аьннар! Беркате хилба цар къахьегама никъ, кхы а дукха лоархӏаме проекташ кхолла аьттув, низ хилба цар, хьажархошта безарех хилба уж! Хӏара керда эфир мехкахой вахаре гӏозал, дог тедеш дола хоза хоамаш дахьаш хийла. Тахан санна массанена дезаш, лоархӏаш къахьегарех хилда шо!
