Хоржамаш тӏакхоачаш, Мехкадас кхайкарал дир Гӏалгӏайчен бахархошка
Россе Паччахьалкхен Думан, Гӏалгӏайчен Халкъа Гуллама депутатий хоржамаш тов бетта 18, 19, 20-ча деношка дӏахьош хиларца дувзаденна, республикан кулгалхочо Келаматанаькъан Махьмуд-Ӏаьлас кхайкарал дир республикан бахархошка. Цо белгалдир, уж денош Гӏалгӏайчен хургдолчун лоархӏаме долга.
Республикан Кулгалхочо аьлар, мехка хьалхашка латта декхараш тийша да паччахьалкхено, Россе Президента белгалдаьраш нийса кхоачашдеш хиларах. Цахаддаш Путин Владимира хьаллоацаш хиларах, Гӏалгӏайче дика дегӏайоагӏаш я, хьалъеш я вахара гӏишлош, новкъостал ду дезалашта, хьакхолл дешара, балха хьалаш. Махьмуд-Ӏаьлас белгалдир из никъ, лорабеш, дӏахо бахьа безилга.
Кхайкарал чакхдоалаш, цо аьлар, Гӏалгӏайчен бахархой даим хиннаб цхьоагӏо, барт болаш хиларца цӏихеза, из иштта хиларах хоржамаш а дика дӏахьоргда.
Цо тӏахьийхар беррига вай республикан бахархой, цу дийнахьа хоржамий даькъ тӏа кхадж тассара. Из да граждански декхар. Цу тайпара хьаллоац Россе Президента беррига мохк, Гӏалгӏайче дегӏайоалаяра политика.
